Museo Thyssen-Bornemisza

Na Galipedia, a Wikipedia en galego.
Saltar ata a navegación Saltar á procura
Museo Thyssen-Bornemisza
Site of the Retiro and the Prado in Madrid 49 (29684554308).jpg
PaísEspaña España
CidadeComunidade de Madrid Madrid
DirectorGuillermo Solana
Inauguración1992
Visitantes944.827 (2013)
Sitio Webwww.museothyssen.org

O Museo Thyssen-Bornemisza é unha pinacoteca de mestres antigos e modernos situada en Madrid (España). A súa existencia débese ao acordo de arrendamento (1988) e á posterior adquisición, por parte do Goberno español (1993), do núcleo máis valioso da colección privada reunida ao longo de sete décadas pola familia Thyssen-Bornemisza. Este fondo artístico achegou numerosos exemplos de pintores estranxeiros ausentes dos museos españois, desde o gótico dos séculos XIV e XV (Duccio, Jan van Eyck) ata o pop art e os anos 1980 (Roy Lichtenstein, Lucian Freud), polo que veu a complementar o repertorio exposto nos dous principais centros estatais, o Museo do Prado e o Raíña Sofía. A apertura do Museo Thyssen-Bornemisza en 1992 deu lugar, ao unirse a estes dous museos, ao chamado Triángulo da Arte do paseo del Prado, área museística de Madrid que concentra o acervo pictórico máis importante de España.

A institución, xestionada por unha fundación baixo control público, ten a súa sede nun edificio histórico, o Palacio de Villahermosa, onde exhibe o groso da súa colección: máis de 700 obras (outras sesenta expóñense en depósito no MNAC de Barcelona). Grazas a un anexo sumado en 2004 ampliou a súa exhibición cunhas 240 pezas máis, prestadas por Carmen Cervera, viúva do barón Thyssen. Paralelamente, o museo alberga múltiples exposicións temporais.

Segundo The Art Newspaper, baseándose en datos facilitados polos propios museos, en 2013 o Thyssen foi o quinto museo máis visitado en España, con 944.827 visitantes, situándose no posto número 61 do seu ránking dos 100 museos de arte máis visitados do mundo.[1]

Notas[editar | editar a fonte]

  1. (en inglés) Visitor Figures 2013. Vol. XXIII, No. 256. April 2014, pág. 15. The Art Newspaper. Consultado o 8 de decembro de 2014.

Véxase tamén[editar | editar a fonte]


Ligazóns externas[editar | editar a fonte]

Coordenadas: 40°24′58″N 3°41′42″O / 40.41611, -3.69500

Traído desde "https://gl.wikipedia.org/w/index.php?title=Museo_Thyssen-Bornemisza&oldid=4815454"