Túnel ferroviario de alta velocidade de Guadarrama

Na Galipedia, a Wikipedia en galego.
Saltar ata a navegación Saltar á procura

Coordenadas: 40°46′44″N 3°46′04″O / 40.77889, -3.76778

Boca sur do túnel de Guadarrama.

O túnel de Guadarrama é un túnel ferroviario de 28 km de lonxitude que atravesa a serra de Guadarrama. É a maior obra de enxeñería civil que se levou a cabo en España, ademais de ser o túnel máis longo do país, o sexto de Europa e o noveno do mundo en 2016.

As súas obras comezaron a finais de 2002 e nelas participaron máis de 4.000 traballadores de manera simultánea. O túnel entrou en servizo o 22 de decembro de 2007.

Características[editar | editar a fonte]

A infraestrutura parte do concello de Miraflores de la Sierra, na Comunidade de Madrid, a unha cota de 998 metros. Atravesa a serra de Guadarrama acadando unha altura máxima de 1.200 metros, cunha pendente do 1,5% e volvendo a descender ata os 1.114 metros na súa boca norte, xunto á estación de Segovia-Guiomar, nas proximidades da cidade de Segovia. O máximo recubrimento da bóveda do túnel atópase na contorna do Pico de Peñalara, con 992 metros de altura nese punto.

Está formado por dous tubos paralelos, un para cada sentido da circulación, dos que as máquinas tuneladoras extraeron 4 millóns de m³ de terra. Cada un ten 28 km de lonxitude, cun diámetro de 9,5 m e unha separación entre ambos de 30 m. Dispón de galerías de emerxencia unindo ambos os corredores cada 250 m, unha gran estancia autónoma e estanca a metade de percorrido, con cabida para 1.200 persoas para o seu uso en caso de emerxencia e instaláronse ventiladores reversibles que poidan inxectar aire se ocorrese un incendio. O deseño realizouse para que os trens que o percorran poidan alcanzar altas velocidades sen comprometer con iso a infraestrutura.

Este gran túnel forma parte da liña férrea de alta velocidade Madrid-Segovia-Valladolid, a cal une as dúas submesetas atravesando o Sistema Central, poñendo a viaxe desde a capital de España a Valladolid en 50 minutos e a pouco máis de 20 ata Segovia mediante trens de alta velocidade. A súa construción é así mesmo fundamental para as comunicacións ferroviarias das rexións da cornixa cantábrica e o noroeste peninsular, dado que por el pasará o corredor que comunicará mediante trens de alta velocidade Madrid con Galicia, Asturias, Cantabria, o País Vasco e, finalmente, a conexión co suroeste francés.

Véxase tamén[editar | editar a fonte]

Ligazóns externas[editar | editar a fonte]

Traído desde "https://gl.wikipedia.org/w/index.php?title=Túnel_ferroviario_de_alta_velocidade_de_Guadarrama&oldid=4337642"